“Zuloaga 1870-1945” aktibitateak

HITZALDI-ZIKLOA: ZULOAGA 1870–1945

Mikel Lertxundi Galiana eta Javier Novo González erakusketaren komisarioen eskutik, 3 hitzaldiko zikloa egongo da. Hitzaldi horietan Ignacio Zuloagaren bizitzan eta obran sakonduko da, munduko panorama artistikoko protagonista garrantzitsua eta XX. mende hasierako pintura figuratiboaren erreferente absolutua baita.

“ZULOAGA DELA-ETA” ZINEMA-ZIKLOA

Urte horretan Gaztelako herrietan eta hango ohituretan jarri zuen arreta, eta nostalgia eta pesimismo apur batez irudikatu zuen, azken koloniak galdu ostean, nazioarteko eragina galdu zuen eta sozialki eta politikoki hondatzen ari zen Espainia. Mende amaierako egoera dramatiko horretan, 98ko belaunaldia osatzen zuen intelektual erregeneratzaileen taldeak Zuloagaren margolanetan ikusi zuten euren literaturaren ezaugarri zen atzerapen nazionalari egindako salaketaren paradigma.

Zuloaga 1870-1945 erakusketa dela-eta, José Julián Bakedanok antolatutako zinema-zikloak 98ko belaunaldiko idazleen obrak erreferentzia gisa hartzen dituzten filmak eskainiko ditu. Hamar saio izango dira guztira, eta honako liburu hauetan oinarritutako izen bereko filmak ikusi ahal izango dira pantailan: Miguel de Unamunoren La tía Tula, Pío Barojaren Las inquietudes de Shanti Andía, Zalacaín el aventuro edo La busca eta Ramón María del Valle-Inclánen Flor de Santidad, bai eta Sonata de Otoño eta Sonata de estío lanetan oinarritutako Sonatas (Las aventuras del marqués de Bradomín) lana ere. Horrez gain, Azorínen La guerrilla, Manuel eta Antonio Machadoren La duquesa de Benamejí eta Valle-Inclánen Luces de Bohemia antzerti-testuen moldaketak ere proiektatuko dira, bai eta Antonio Machadoren Campos de Castilla liburuko "La tierra de Alvargonzález" poeman oinarritutako La Laguna Negra filma ere. Lan horiek guztiek agerian jartzen dute belaunaldi horren literaturak eta Ignacio Zuloagaren obra askok garaiko errealitate sozialarekin zuten konpromisoa.