Jarduerak

Ispilua izan daiteke altzari bat, apaingarri bat nahiz begirada sakontzeko aitzakia bat. Haurrentzat antolaturiko bisita-lantegi hauetan, artistaren ibilbideari emango zaio arreta, eta, hortik abiatuta, nork bere ibilbidea osatuko du, askotariko dinamikak baliatuz, hala nola marraztuz edo hainbat material erabiliz maketa txikiak eginez. Basterretxeak berak bezalaxe, haurrek ere aukera izango dute bizitoki izan nahiko lituzketen arkitektura eta espazio posibleak imajinatzeko eta beren diseinuak katalogo batean jasotzeko.

Azken batean, espazio bat eskainiko zaie artistak hain maitea zuen ideia, arte aplikatua, lantzeko, eta, bide batez, Basterretxeak egindako zenbait altzari eta industria diseinu ezagutuko dituzte.

Jarduera hau Irudimen Artistikoko Laborategia zeharkako proiektuaren parte da. Proiektu horren baitan, askotariko metodologiak eta dinamikak ikertzen dira museoa bisita konbentzionalaz bestelako esperientzien bidez ezagutzeko.

Informazio-oharra: proposamen honen izaera artistikoa dela-eta, bi deialdi antolatu dira, ekimena eskolako etapa eta adin-tarte bakoitzaren premien arabera egokitu ahal izateko.