Bilduma online eta irudien salmenta

Ando Hiroshigeren jarraitzailea izan zen Nakayama Sugakudo artista, txoriak eta loreak marrazten espezializatu zen, kacho-ga deritzon generoan, hots, jatorria txinatar pinturan duen eta Asiako artean tematika jasotzat duten generoan. Kacho-ga arrakasta handiz garatu zen ukiyo-e artean XIX. mendeko bigarren herenetik aurrera. Palacio Bildumako japoniar ataleko gainerako egileekin alderatuta, Edo Aroaren azken hamarraldietan lan egin zuen artista berantiarra da Makayama Sugakudo. Egile horren obra ezagunena txoriei emandako berrogeita zortzi grabatuk osatutako serie hau izan zen, Sho utsushi shiju hattaka izenburuko seriea, eta Bilboko Arte Ederren Museoak haietatik bi estanpa ditu. Konposizioa oso antzekoa da seriea osatzen duten irudi guztietan, serie hori ia osorik kontserbatzen du Londresko British Museoak (1915,0823,0. 180 Inb. zk.). Eszena nagusia hegaztien eta landareen estudio naturalista zehatzari emana dago, marrazkiak zehaztasun maila handikoak dira botanikaren eta ornitologiaren ikuspegietatik, eta eskalan daude irudikatuta. Goi eskuineko ertzean elkarren gainean jarritako bi kartutxo ikus ditzakegu, seriearen izenburua adierazten du azpikoak eta txoriaren eta lorearen izenak gainekoak.
Obra honetan bi txantxangorri daude mitxoleta batzuen azpian pausatuta. Artistaren sinadura ikus daiteke eszenaren ondoan. Kolore horiko marko antzeko batek inguratzen du estanpa, eta haren behe ezkerreko ertzean, goitik behera, zentsorearen zigilua (aratame) ikus dezakegu, zodiakoko zeinuen zikloarekin lotutako data adierazten duela (hitsuji roku). Jarraian, estanpa honek seriearen baitan duen zenbakia dago adierazita, kasu honetan hamaseigarrena da (juroku). Azkenik argitaldariaren izena ageri da, Koeido. Argitaraldi hau oso zainduta dago, eta lehorrean landutako ehundura du hondoko azalera osoak. Nakayama Sugakudok marrazki guztiz zehatza landu zuen ñabardurez beteriko kolore meheak eta tonalitate mailaketa finak erabiliz, eta gero, estanpatzaileak grabatuko zuen bokashi deritzon teknikaren bidez tindatuta.
Lan hau argitaratu zuten datetan argitaldari Tsutaya Kichizo, XIX. mendeko argitaldari garrantzitsu eta oparoenetakoa, une horretako ukiyo-e arte motako artista handienekin ari zen lanean, esate baterako Hiroshigerekin eta Kunisadarekin, baita haien ondorengo Hiroshige II.arekin eta Kunisada II.arekin ere. (David Almazán, 2014)

Bibliografia hautatuta

• Arte japonés y japonismo [Cat. exp.]. Bilbao, Bilboko Arte Ederren Museoa-Museo de Bellas Artes de Bilbao, 2014. pp. 226, 332-334, n° inv. 102.