Berriak
17-12-24
2025eko Aurrerapena
Handitze arkitektonikorako eta eraldaketa museografikorako prozesuan, Bilboko museoak bere historiarekin eta etorkizuneko proiekzioarekin duen lotura bihurtu da bere jarduera publikoaren ardatz, eta horren inguruan antolatu da. Hona hemen erakusketen egutegia:
Deialdi berriak (lehen hiruhilekoa)
Max Ernsten (Brühl, Alemania, 1891-Paris, 1976) 54 artelan jaso ditu museoak komodatu eran. XX. mendeko artearen eta mugimendu surrealistaren figura gakoetako bat da Ernst. 1922 eta 1928 artean datatutako 14 margolan, 6 marrazki eta 34 fototipia dira, Ernst surrealismora hurbiltzearekin lotutako esperimentazio etapa batekoak. Lanak Aram Mouradianen (Southport, Erresuma Batua, 1892-Paris, 1974) bildumatik datoz; hark eman zuen artistaren berri Parisko galerian.
Hain zuzen ere, bildumagilearen eta margolariaren arteko harremana aztertuko dute 4. Museoaren Koadernoan, Georges Sebbagek, mugimendu surrealistaren historialari handietako batek, idatzitako testu batean. Ikusgai izango den aukeraketak Obra Gonbidatua programaren beste proposamen bat osatuko du, eta, oraingoan, Ernstek abangoardiako mugimenduen konfigurazioan duen garrantzia utziko du agerian.
Babeslea: Banco Santander Fundazioa
Les éclairs au-dessous de quatorze ans, 1925
Bilduma partikularra
Felix Maria de Samaniegoren (Guardia, Araba, 1745-1801) Alegia ezagunen ehun bat hautatuz ekoitzi du museoak liburu baten euskarazko edizioa.
Horretarako, Daniel Tamayo margolariak (Bilbo, 1951) irudien corpus bat osatu du, popetik gertu dagoen estiloarekin, nagusiki animaliak protagonista dituzten kontakizun horien izaera moralizatzailea, eta batzuetan satirikoa, ilustratzeko. Hemen, gorriz eta beltzez egindako bikromia bateraino araztuta, Tamayok tresna digitalak baino ez ditu erabiltzen. Baliabide horretara 1990ean hurbildu zen lehen aldiz, eta beste baliabide piktoriko klasiko batzuek, hala nola marrazkiak, eskaintzen dituztenak erabili balitu baino arinago eta efizientzia handiagoz pentsatu eta egiteko aukera ematen dio.
Tamayoren irudi originalekin batera aurkeztuko da argitalpena.
Babeslea: BBK Banku-fundazioa
Galeperra, 2024
Artistaren bilduma
Pedro Berruguete (Paredes de Nava, Palentzia, c. 1450-Madril?, 1503) Espainiako Errenazimentuko artistarik garrantzitsuenetako bat da. Italiatik itzuli ostean egindako lau bertsioetako bat da aurkeztuko den Deikundea. Besteak, hainbat aldaerarekin, Mirafloresko kartusian (Burgos), Becerrilgo Santa Maria de Campos elizako parrokia-museoan eta Navako Santa Eulalia de Paredes elizan kontserbatzen dira, denak Palentzian. Joan den mendearen erdialdetik Espainiako bilduma partikular batean egon den bertsio hau aterako du argitara museoak, kontserbazio eta zaharberritze tratamendu konplexu baten ondoren.
Babeslea: Iberdrola
Artisten artxiboak eta funtsak nahitaezkoak dira haien sormen-testuingurua, eraginak eta erronkak ulertzeko. Museoak gordetzen duen dokumentu multzo zabalari Eduardo Zamacois margolariaren (Bilbo, 1841-1871) materialak gehitu zaizkio, haren ondorengoek kontserbatuak. Era berean, Adolfo Guiarden (Bilbo, 1860-1916) obren presentzia zabaldu egin da, bere obren dokumentuak, gutunak, argazkiak eta zirriborroak sartuz, eta baita bere aita Alphonse Guiarden (Euskal Herrian argazkigintzaren aitzindari izan zen) argazki-plakak eta anaia Teofilo Guiard historialari eta idazlearekin izandako korrespondentzia ere. Horrekin batera, Felipe Manterolaren (Zeanuri, Bizkaia, 1885-1977) eta Patricio Echeverria, S.A. (PESA) enpresaren argazki-funtsak ere badaude, euskal landa-ingurunearen benetako ikuspegia jasotzen dutenak, batetik, eta herrialdeko industria indartsuaren jarduerarena, bestetik. Azkenik, Maria Francisca Dapenarekin (Barruelo de Santullán, Palentzia, 1924-Bilbo, 1995) lotutako funts artistiko eta dokumentalak artistaren figura eta haren praktika artistikoaren konpromiso soziala azaltzen ditu.
Babeslea: BBK Banku Fundazioa
Bederatzi ibilaldik osatzen dute Pedro G. Romeroren (Aracena, Huelva, 1964) bideoinstalazio hau, eta, Sevilla agertoki dutela, flamenkoaren munduari, mundu horren ertzei, lotutako beste horrenbeste pertsonaia dituzte protagonista. Bederatzi artistak zenbait eremu zeharkatzen dituzte esplorazio psikogeografiko, bisual eta soinudun batean, flamenkoa bizitzeko modu berezi bat dela aditzera emanez. Bideo-entsegu gisa, erretratu horiek aldi berean zabaltzen dira haien artean noraezean dabilen ikuslearen aurrean, soinu eta irudi batzuetatik hurbil, ia kalean balego bezala. Pedro G. Romerok 1985etik dihardu artista gisa, baina ikertzailea, komisarioa, editorea eta zinema zuzendaria ere bada. Laurogeita hamarreko hamarkadaren amaieratik, Máquina Ph proiektuan ari da lanean. Proiektu horren proposamenetako bat da Ikerketa Flamenko eta Garaikideen Plataforma Independentea..
Babeslea: BBVA Fundazioa
Bideo-instalazioa. Las flamencas / Los flamencos (2021)
- Obra gonbidatua. Arriola-Lerchundi Liburutegiko eskuizkribuak
Otsailaren 9ra arte. Babeslea: Banco Santander Fundazioa - Arte Modernoaren Bilboko Museoa, 1924-1945
Otsailaren 16ra arte. Babeslea: BBK Banku-fundazioa - Ignacio Zuloaga. Erik Satieren erretratua. Begoña María Azkue legatua
Martxoaren 2ra arte. Hall galeria - Goenaga. Alkiza, 1971-1976
Martxoaren 23ra arte. Babeslea: Petronor - Antonio de Guezala (1889-1956). Funts berria
Maiatza arte. Babeslea: BBK Banku-fundazioa